रत्ननगर । रत्ननगर–१, बकुलहरमा रहेको आयुर्वेद तथा वैकल्पिक चिकित्सालयमा एक समारोहबीच स्वर्णविन्दु प्राशन कार्यक्रमको शुभारम्भ गरिएको छ । बागमती प्रदेश, स्वास्थ्य मन्त्रालयका स्वास्थ्यमन्त्री कृष्ण थापामगरले बालबालिकालाई स्वर्णविन्दु खुवाएर सो कार्यक्रमको उद्घाटन गरेका हुन् ।
सो अवसरमा बोल्दै स्वास्थ्यमन्त्री कृष्ण थापामगरले प्रादेशिक अस्पतालको रुपमा रहेको आयुर्वेद तथा वैकल्पिक चिकित्सालयमा स्तर वृद्धि र भौतिक पूर्वाधारसहित २५ बेड क्षमताको अस्पतालका रुपमा सेवा सुरू भएको र अस्पतालमा थप प्रविधि र कर्मचारी व्यवस्थापनका लागि मन्त्रालयले कुनै सम्झौता नगर्ने बताए । आयुर्वेदका १३ प्रकारका औषधिमध्ये १० प्रकारका औषधि सो चिकित्सालयअन्तर्गतको औषधि उत्पादन केन्द्रबाट उत्पादन हुँदै आएको र केही महिनापछि थप नौ प्रकारका औषधि उत्पादन गर्ने योजना रहेको उनले सुनाए । उनले बागमती प्रदेशका १३ जिल्लालाई पुग्ने औषधि यसै केन्द्रबाट उत्पादन गर्न सकिने बताए ।
स्वर्णविन्दु प्राशन बच्चाहरुको वृद्धि विकास, मानसिक विकास र रोग प्रतिरोधी क्षमता बढाउनका लागि मह¤वपूर्ण रहेको जानकारी दिँदै यस चिकित्सालयबाट हरेक महिना ९ गते ५०० बालबालिकालाई स्वर्णविन्दु प्राशन कार्यक्रम सञ्चालन हुने उनले बताए ।
सो कार्यक्रममा प्रमिला दुवाडीले स्वर्णविन्दु प्राशनसँगै पञ्चकर्मको उपचार गरेपश्चात् आफ्नो बच्चामा अटिजमको समस्या ८० प्रतिशत समाधान भएको भन्दै बालबालिकाको निम्ति स्वर्णविन्दु प्राशन अत्यन्तै उपयोगी रहेको बताइन् ।
चिकित्सालयका अध्यक्ष राजेन्द्र अधिकारीको अध्यक्षतामा भएको कार्यक्रममा कार्यालय प्रमुख डा। कोपिला अधिकारीले स्वागत मन्तव्य व्यक्त गर्दै आर्थिक वर्ष २०८१–०८२ मा तीन हजार २३४ बालक र दुई हजार ६९३ बालिका गरी पाँच हजार ९२७ बालबालिकालाई स्वर्णविन्दु प्राशन गराइएको र हरेक महिना ५०० बालबालिकालाई स्वर्णविन्दु प्राशन गराइने जानकारी दिइन् ।
कार्यक्रममा बागमती प्रदेशका पूर्वमन्त्री कृष्णप्रसाद खनालले सबैको अथक प्रयासबाट भौतिक निर्माणलगायत चिकित्सालयको स्तर वृद्धि गर्न सफल भएको भन्दै अब आवश्यक कर्मचारीको व्यवस्थापन र सुरक्षागार्डको व्यवस्था मिलाउन स्वास्थ्यमन्त्रीलाई आग्रह गरे ।
डा। देवेन्दकुुमार यादवले सञ्चालन गरेको कार्यक्रममा जिल्ला समन्वय समितिका अध्यक्ष नारायणप्रसाद अधिकारी, आयुर्वेद औषधि उत्पादनकेन्द्रका डा। सुरेश महर्जन, स्वास्थ्य मन्त्रालयका सचिव डा। सुमित्रा गौतम, मदन भण्डारी स्वास्थ्य विज्ञान प्रतिष्ठानका उपकुलपति प्राडा प्रदीप ज्ञवाली, स्वास्थ्य निर्देशनालयका निर्देशक डा। नरेन्द्र झा, स्वास्थ्य आपूर्तिकेन्द्रका निर्देशक डा। अर्जुन सापकोटा, रत्ननगर–१ का वडाध्यक्ष कुलप्रसाद सापकोटा, इलाका प्रहरी कार्यालय रत्ननगरका डिएसपी रञ्जन अवालगायतको सहभागिता रहेको थियो ।
कार्यक्रमपश्चात् स्वास्थ्यमन्त्रीसहितको टोलीले आयुर्वेद तथा वैकल्पिक चिकित्सालय तथा आयुर्वेद औषधि उत्पादनकेन्द्रको अवलोकन गरेको थियो ।
